मंदिरात नवरात्रोत्सवाला उत्साहात प्रारंभ: ५६१ घटज्योती प्रज्वलित; नवनिर्मित सभागृहाचे मान्यवरांच्या हस्ते उद्घाटन; स्त्रीशक्तीचा जागर

   

भंडारा दि. १५ 

भंडारा जिल्ह्यातील पवनी जवळील प्रसिद्ध महालक्ष्मी म्हणून ओळख असलेल्या मौजा लोणारा येथील महासाती बेनाबाई मंदिरात नवरात्रोत्सवाला मोठ्या उत्साहात आणि भक्तीमय वातावरणात प्रारंभ झाला आहे. रविवार (दि. ११ ऑक्टोबर) रोजी दुपारी २.१० वाजताच्या सुमारास विधिवत पूजा-अर्चा करून मंदिरात तब्बल ५६१ घटज्योती प्रज्वलित करण्यात आल्या. या मंगलमय सोहळ्यामुळे संपूर्ण मंदिर परिसर भक्ती, श्रद्धा आणि उत्साहाने न्हाऊन निघाला आहे.

नवरात्रोत्सवाच्या निमित्ताने देवस्थान समितीच्या वतीने भाविकांच्या सोयीसाठी बांधण्यात आलेल्या स्वतंत्र नवनिर्मित सभागृहाचे उद्घाटन उपस्थित प्रमुख मान्यवरांच्या हस्ते करण्यात आले. या नवीन व्यवस्थेमुळे उत्सवाचे धार्मिक महत्त्व अधिकच अधोरेखित झाले आहे.

यंदाच्या नवरात्रोत्सवाचे सर्वात मोठे वैशिष्ट्य म्हणजे 'स्त्रीशक्तीचा जागर'. सकाळच्या पूजा-अर्चेपासून दीपप्रज्वलन, नवनिर्मित सभागृहाचे उद्घाटन, प्रमुख अतिथींचे स्वागत, सूत्रसंचालन, आभारप्रदर्शन आणि प्रसाद वितरणापर्यंतच्या विविध कार्यक्रमांची संपूर्ण जबाबदारी देवस्थान समितीसह गावातील मुली आणि महिलांनी समर्थपणे सांभाळली. त्यांच्या उत्कृष्ट नियोजन आणि अंमलबजावणीमुळे त्यांच्यातील कार्यक्षमता व संघटनात्मक कौशल्याचे दर्शन घडले.

धार्मिक परंपरेचे जतन करताना महिलांना नेतृत्वाची संधी देणारा हा उपक्रम नवरात्रोत्सवाच्या स्त्रीशक्तीच्या संकल्पनेला अगदी साजेसा ठरला. गावातील महिला आणि मुलींच्या सक्रिय सहभागामुळे यंदाच्या उत्सवाचा आनंद द्विगुणित झाला आहे.

या उद्घाटन आणि घटस्थापना सोहळ्याला जिल्हा परिषद सदस्य मोहन पंचभाई, जिल्हा मध्यवर्ती बँकेचे अध्यक्ष सुनील फुंडे, सरपंच दोनोड, पोलीस पाटील सुरेंद्र वाघमारे, तंटामुक्ती समितीचे अध्यक्ष भागवत पंचभाई यांच्यासह इतर अनेक मान्यवर उपस्थित होते.

मान्यवरांच्या उपस्थितीत नवरात्रोत्सवाचा भव्य शुभारंभ झाल्याने गावकऱ्यांमध्ये आनंदाचे वातावरण आहे. घटज्योतींच्या प्रकाशामुळे मंदिर परिसर लखलखून निघाला असून पुढील नऊ दिवस देवीच्या पूजा-अर्चा व विविध धार्मिक कार्यक्रमांचे आयोजन केले जाणार आहे. महासाती बेनाबाई देवीवरील गावकऱ्यांची अथांग श्रद्धा, देवस्थान समितीचे चोख नियोजन आणि महिला-मुलींचा उत्स्फूर्त सहभाग यांमुळे लोणारा येथील नवरात्रोत्सवाची सुरुवात अत्यंत उत्साहपूर्ण वातावरणात झाली आहे.