"गुन्हेगारीला आळा घालण्यासाठी प्रत्येक दुकानासमोर सीसीटीव्ही लावा; ठाणेदार सागर भामरे यांचे आवाहन"

"व्यापाऱ्यांचे सहकार्य अन् सीसीटीव्हीची नजर; शहरातील कायदा-सुव्यवस्थेसाठी पोलिसांचा नवा प्लॅन"

दि. २७ चांदूरबाजार (ग्रामीण उदय न्यूज नेटवर्क):
शहरात घडणाऱ्या अनुचित घटनांना आळा घालण्यासाठी आणि कायदा व सुव्यवस्था राखण्यासाठी प्रत्येक व्यावसायिकाने आपल्या दुकानासमोर समाजहितासाठी किमान एक तरी सीसीटीव्ही कॅमेरा लावावा, असे आवाहन आयपीएस तथा ठाणेदार सागर भामरे यांनी केले आहे. स्थानिक पंचायत समिती सभागृहात आयोजित शांतता समितीच्या बैठकीत ते मार्गदर्शन करत होते.

 सीसीटीव्ही कॅमेरे गुन्हेगारी नियंत्रणासाठी अत्यंत उपयुक्त आहेत. त्यामुळे व्यावसायिकांनी पोलीस प्रशासनाला सहकार्य करावे.

 शक्य असल्यास सर्वसामान्य नागरिकांनीही आपल्या घराबाहेर एक सीसीटीव्ही कॅमेरा अवश्य लावावा. समाजहितासाठी हे कर्तव्य प्रत्येकाने पार पाडले पाहिजे.

आगामी सण आणि उत्सवांच्या पार्श्वभूमीवर शहरातील शांतता आणि सुव्यवस्था अबाधित राखण्यासाठी या बैठकीचे आयोजन करण्यात आले होते.

शहरासोबतच ग्रामीण भागातही रात्रीच्या गस्तीमध्ये वाढ करण्यात येणार असून पोलीस प्रशासनाकडून प्रभावी कारवाया सुरूच राहतील, अशी माहिती ठाणेदार सागर भामरे यांनी दिली.

या बैठकीच्या मंचावर खालील प्रमुख पदाधिकारी व अधिकारी उपस्थित होते:

मनीषा नांगलिया (नगराध्यक्ष)

शेख इब्राहिम (उपाध्यक्ष)

रेहमान शेख

पी.आय. अशोक जाधव (यांनीही बैठकीत उपस्थितांना मार्गदर्शन केले)

या बैठकीला स्थानिक नगरसेवक, विविध व्यापारी संघटनांचे पदाधिकारी, व्यावसायिक, पोलीस पाटील, पत्रकार तसेच नागरिक मोठ्या संख्येने उपस्थित होते. बैठकीदरम्यान सागर भामरे यांनी त्यांच्या कार्यकाळात घडलेल्या विविध घटनांची माहिती देखील उपस्थितांना दिली.