🥇 आशियाई खेळ २०२६: भारताच्या लेकींचा ऐतिहासिक पराक्रम; गोल्फ आणि महिला हॉकीमध्ये 'सुवर्ण' इतिहास!

दि.३ :-

 आशियाई क्रीडा स्पर्धा २०२६ मध्ये (Asian Games 2026) भारताच्या लेकींनी गोल्फ आणि हॉकी या दोन्ही खेळांमध्ये ऐतिहासिक सुवर्ण कामगिरी केली आहे. 

⛳ गोल्फ: प्रणवी अर्सचा ऐतिहासिक 'गोल्डन' पराक्रम

म्हैसूरच्या २३ वर्षीय प्रणवी शरथ उर्सने  महिला वैयक्तिक स्ट्रोक प्ले गोल्फ प्रकारात सुवर्णपदक जिंकून इतिहास रचला आहे. आशियाई क्रीडा स्पर्धेच्या इतिहासात गोल्फमध्ये वैयक्तिक सुवर्णपदक जिंकणारी ती पहिली भारतीय महिला गोल्फर ठरली आहे. 

 अंतिम फेरीच्या सुरुवातीला प्रणवीला तिसऱ्या होलवर 'ट्रिपल बोगी'चा (Triple Bogey) सामना करावा लागला, ज्यामुळे तिच्या तीन स्ट्रोकच्या आघाडीला फटका बसला होता. मात्र, तिने कमालीचा संयम दाखवत पुढील होल्सवर तीन 'बर्डीज' मारून शानदार पुनरागमन केले. 

 अंतिम फेरीत इव्हन-पार ७० चा स्कोअर करत तिने चार दिवसांत एकूण १५-अंडर २६५ स्कोअरसह अव्वल स्थान पटकावले. तिने चीनच्या यिन रुओनिंगला अवघ्या एका स्ट्रोकने मागे टाकले. 

सांघिक रौप्यपदक: प्रणवीच्या या ऐतिहासिक खेळीच्या जोरावर भारताने महिला सांघिक गोल्फ प्रकारात रौप्यपदक (Silver Medal) देखील खिशात घातले. या संघात प्रणवीसोबत आदिती अशोक आणि दीक्षा डागर यांचा समावेश होता.

🏑 महिला हॉकी: ४४ वर्षांची प्रतीक्षा संपली, चीनचा पराभव!

भारतीय महिला हॉकी संघाने जपानमधील नागोया येथे खेळवल्या गेलेल्या रोमांचक अंतिम सामन्यात गतविजेत्या आणि ऑलिम्पिक रौप्यपदक विजेत्या चीनचा १-० असा पराभव करत सुवर्णपदक जिंकले. महिला हॉकीमध्ये भारताचे हे आशियाई क्रीडा स्पर्धेतील १९८२ नंतरचे पहिलेच सुवर्णपदक असून भारताने तब्बल ४४ वर्षांचा प्रदीर्घ दुष्काळ संपवला आहे. 

 भारतासाठी मॅचचा एकमेव आणि ऐतिहासिक गोल लालरमसियामीने  सामन्याच्या १० व्या मिनिटाला केला. विशेष म्हणजे, हा लालरमसियामीचा २०० वा आंतरराष्ट्रीय सामना होता आणि तिने या सामन्यात सुवर्ण गोल करून तो संस्मरणीय बनवला.

 गोल केल्यानंतर भारतीय संघाने अभेद्य बचाव (Defense) केला. दिग्गज गोलकीपर सविता पुनियाने चीनचा पेनल्टी स्ट्रोक अत्यंत उत्कृष्टपणे वाचवून भारताची १-० अशी आघाडी शेवटपर्यंत टिकवून ठेवली.

 या ऐतिहासिक सुवर्णपदकासह भारतीय महिला हॉकी संघाने २०२८ च्या लॉस एंजेलिस (LA 2028) ऑलिम्पिकसाठी थेट पात्रता मिळवली आहे.

 या ऐतिहासिक विजयानंतर ओडिशाचे मुख्यमंत्री मोहन चरण माझी यांनी भारतीय संघातील प्रत्येक महिला खेळाडूला ११ लाख रुपये आणि सपोर्ट स्टाफला प्रत्येकी ५.५ लाख रुपयांचे रोख बक्षीस जाहीर केले आहे.