शिरजगाव कसबा येथे महाशिवरात्रीनिमित्त साबुदाणा खिचडी व मठ्ठा वाटप

 महाशिवरात्रीच्या पावन पर्वावर शिरजगाव कसबा येथे भाविकांसाठी एक उपक्रम करण्यात आला.

दि. १६ शिरजगाव कसबा (ग्रामीण उदय न्यूज नेटवर्क):

पवित्र महाशिवरात्री उत्सवाचे औचित्य साधून शिरजगाव कसबा येथील बस स्थानक (Bus Stand) परिसरात भाविक आणि प्रवाशांसाठी साबुदाणा खिचडी आणि थंडगार मठ्ठा वाटपाचा कार्यक्रम उत्साहात पार पडला.

महाशिवरात्रीनिमित्त अनेक भाविक उपवास धरतात. या भाविकांची गैरसोय होऊ नये आणि भक्तीमय वातावरणात त्यांना अल्पोपहार मिळावा या उद्देशाने स्थानिक युवक आणि ग्रामस्थांच्या वतीने हा सामाजिक उपक्रम राबवण्यात आला. सकाळी १० वाजेपासूनच बस स्थानकावर येणाऱ्या प्रत्येक प्रवाशाला आणि परिसरातील नागरिकांना या प्रसादाचे वाटप करण्यात आले.

या उपक्रमासाठी गावातील दानशूर व्यक्तींनी आणि तरुणांनी पुढाकार घेतला होता. "भाविकांची सेवा हीच ईश्वर सेवा" या भावनेतून दरवर्षीप्रमाणे यंदाही हा उपक्रम मोठ्या प्रमाणावर राबवल्याचे आयोजकांनी सांगितले. बस स्थानकावर उतरणाऱ्या प्रवाशांनी या उपक्रमाचे कौतुक करत समाधान व्यक्त केले.