प्रवासी वाऱ्यावर, प्रशासन सुस्त; शिरजगावच्या बसस्थानकाला लागली 'अस्वच्छतेची' ग्रहण!

प्रशासनाच्या दुर्लक्षामुळे मूलभूत सुविधांचा अभाव; तातडीने लक्ष देण्याची ग्रामस्थांची मागणी

दि. २० शिरजगाव कसबा:
चांदूर बाजार तालुक्यातील महत्त्वाचे केंद्र असलेल्या आणि सुमारे ३० हजार लोकसंख्या असलेल्या शिरजगाव कसबा येथील बसस्थानकाची सध्या अत्यंत दयनीय अवस्था झाली आहे. लाखो रुपये खर्चून उभारलेले हे बसस्थानक आज घाणीच्या विळख्यात सापडले असून, प्रवाशांना दैनंदिन प्रवासात मोठ्या गैरसोयींचा सामना करावा लागत आहे.

प्रमुख समस्या:

अस्वच्छता आणि दुर्गंधी: बसस्थानक परिसरात सांडपाणी साचल्याने परिसरात मोठी दुर्गंधी पसरली आहे. यामुळे साथीचे रोग पसरण्याची भीती व्यक्त होत आहे.

सुविधांचा अभाव: बसस्थानकाची दारे, खिडक्या तुटलेल्या आहेत. तसेच पिण्याचे पाणी, प्रसाधनगृह आणि वीजपुरवठा नसल्याने प्रवाशांची, विशेषतः महिला आणि विद्यार्थ्यांची मोठी कुचंबणा होत आहे.

सुरक्षेचा प्रश्न: बसस्थानक परिसरात पथदिवे नसल्याने रात्रीच्या वेळी अंधाराचे साम्राज्य असते. याचा फायदा घेत डिझेल चोरीसारखे प्रकार घडत आहेत. तसेच रात्री मुक्कामी असलेल्या बसेसच्या सुरक्षेचाही प्रश्न निर्माण झाला आहे.

अतिक्रमण: परिसरात शेणाचे ढिगारे, मोकाट गुरे आणि खाजगी वाहनांचे अतिक्रमण वाढल्याने परिसर अस्वच्छ झाला आहे.

प्रवीण डावलकर (आगार व्यवस्थापक, चांदूर बाजार): बसस्थानकाच्या दुरुस्तीबाबत मुख्य कार्यालयाशी पत्रव्यवहार सुरू असून २०२६-२७ च्या नियोजनात यासाठी आवश्यक निधी उपलब्ध होण्याची शक्यता आहे.

अमित लवटे, (सामाजिक कार्यकर्ते)"बसस्थानक परिसरात सांडपाणी साचून दुर्गंधी पसरली आहे. तातडीने स्वच्छता व सुधारणा कराव्यात, अन्यथा रोगराई पसरण्याची शक्यता आहे."

प्रवीण तायडे (आमदार): या प्रश्नाबाबत जिल्हा नियोजन समितीमध्ये पाठपुरावा करून निधी उपलब्ध करून देण्याचे आश्वासन त्यांनी दिले आहे.

मागणी:

शिरजगाव कसबा हे 'ब' दर्जाचे तीर्थक्षेत्र असून येथे कार्तिक उत्सवासाठी मोठी गर्दी होते. या पार्श्वभूमीवर, बसस्थानकाचे सुशोभीकरण करून प्रवाशांना दर्जेदार सुविधा पुरवाव्यात, अशी मागणी ग्रामपंचायत प्रशासनाचे प्रशासक प्रवीण खेरडे यांनी केली आहे.