विदर्भात मोठे प्रशासकीय फेरबदल: कुमार आशीर्वाद नागपूरचे नवे जिल्हाधिकारी; विदर्भातील ४ जिल्ह्यांना नवे नेतृत्व

दि. ६ नागपूर/अमरावती:
राज्य शासनाने आज प्रशासकीय स्तरावर मोठे फेरबदल केले असून, विदर्भातील महत्त्वाच्या जिल्ह्यांमध्ये नवीन जिल्हाधिकाऱ्यांच्या नियुक्त्या जाहीर केल्या आहेत. यामध्ये प्रामुख्याने कुमार आशीर्वाद यांची नागपूरचे नवे जिल्हाधिकारी म्हणून नियुक्ती करण्यात आली आहे.

महत्त्वाच्या नियुक्त्या खालीलप्रमाणे:

 नागपूर : सोलापूरचे जिल्हाधिकारी म्हणून कार्यरत असलेले कुमार आशीर्वाद आता नागपूर जिल्ह्याची धुरा सांभाळतील. नागपूरचे मावळते जिल्हाधिकारी डॉ. विपीन इटनकर यांची बदली करण्यात आली आहे.
चंद्रपूर : चंद्रपूरच्या जिल्हाधिकारीपदी विजयालक्ष्मी बिदरी यांची नियुक्ती करण्यात आली आहे.
गोंदिया : गोंदिया जिल्ह्यासाठी नितीन राऊत यांची जिल्हाधिकारी म्हणून निवड झाली आहे.
बुलढाणा : बुलढाणा जिल्ह्याची जबाबदारी आता राजू गेडाम यांच्याकडे सोपवण्यात आली आहे.

अमरावती महानगरपालिकेत महिला राज:
प्रशासकीय बदलांच्या या लाटेत अमरावती महानगरपालिकेलाही नवीन नेतृत्व मिळाले आहे. वर्षा लढ्ढा यांनी अमरावती महानगरपालिकेच्या आयुक्त  पदाचा पदभार स्वीकारला आहे. शहराच्या विकासकामांना गती देणे आणि प्रलंबित प्रश्न सोडवणे हे त्यांच्यासमोर मुख्य आव्हान असणार आहे.

 अनेक दिवसांपासून रिक्त असलेली पदे भरण्यासाठी आणि आगामी स्थानिक स्वराज्य संस्थांच्या निवडणुकांच्या पार्श्वभूमीवर हे फेरबदल महत्त्वाचे मानले जात आहेत.

 कुमार आशीर्वाद यांनी सोलापूरमध्ये राबवलेले विविध उपक्रम पाहता, नागपूर सारख्या उपराजधानीच्या जिल्ह्याला त्यांच्या अनुभवाचा मोठा फायदा होईल, अशी अपेक्षा व्यक्त केली जात आहे.

विदर्भातील या नवीन नियुक्त्यांमुळे जिल्ह्यांच्या विकासकामांना नवी दिशा मिळण्याची शक्यता आहे. सर्व नवीन अधिकाऱ्यांनी आज किंवा उद्यापर्यंत आपला पदभार स्वीकारण्याचे निर्देश देण्यात आले आहेत.