तेल काढणी युनिटसाठी अर्ज करण्याचे आवाहन

*30 नोव्हेंबरपर्यंत अर्ज करण्यासाठी मुदत

अमरावती, दि. २५ (ग्रामीण उदय न्यूज नेटवर्क) : तेल काढणी युनिटसाठी शेतकऱ्यांसाठी अनुदान योजना राबविण्यात येत आहे. या योजनेसाठी इच्छुकांनी 30 नोव्हेंबरपर्यंत अर्ज करावेत, असे आवाहन कृषी विभागाने केले आहे.

राष्ट्रीय खाद्यतेल अभियान तेलबिया सन 2025-26 मध्ये काढणी पश्चात पायाभूत सुविधा या घटकांतर्गत तेल काढणी युनिट घटकाकरीता शेतकरी उत्पादक संस्था, कंपनी आणि सहकारी संस्था यांना अर्ज करता येणार आहे. यामध्ये बियाणे संकलन आणि तेल काढण्याची कार्यक्षमता वाढविण्यासाठी 10 टन क्षमतेचा तेल काढणी युनिट आणि तेलबियांवर प्रक्रिया करण्यासाठी यंत्रसामुग्री आणि उपकरणे आणि तेलबिया प्रक्रिया युनिटकरीता प्रकल्प खर्चाच्या 33 टक्के किंवा कमाल 9 लाख 90 हजार यापैकी जे कमी असेल त्याप्रमाणे अनुदान अनुज्ञेय राहणार आहे.

केंद्र शासनाच्या सुचनेनुसार सीपेट, लुधियाना व यासारख्या इतर केंद्रीय संस्थेने तपासणी केलेल्या मिनी ऑईल मिल, ऑईल एक्सपीलिअरची उत्पादकनिहाय तेलघाणा मॉडेलला अनुदान अनुज्ञेय राहिल. सदर बाब बँक कर्जाशी निगडीत असून इच्छुक प्रक्रिया भागीदाराने केंद्र शासनाच्या ग्रामीण भंडारण योजना, नाबार्डच्या मार्गदर्शक सुचनांनुसार बँकेकडे प्रकल्प सादर करावा, बँकेने कर्ज मंजूर केल्यानंतर संबंधीत अर्जदार सदर बाबींच्या लाभास पात्र राहणार आहे.

योजनेच्या माहितीसाठी सहायक कृषि अधिकारी, उपकृषि अधिकारी व मंडळ कृषि अधिकारी यांच्याशी सपंर्क साधावा, तसेच इच्छुक अर्जदारांनी दि. 30 नोव्हेंबर 2025 पर्यंत तालुका कृषि अधिकारी यांच्याकडे अर्ज करावा, असे आवाहन जिल्हा अधिक्षक कृषि अधिकारी राहुल सातपुते यांनी केले आहे.