एआयचा चुकीचा वापर भोवला! शेतात वाघ एडिट करून फोटो व्हायरल करणाऱ्या तरुणावर गुन्हा दाखल

सावधान, एआयवर अफवा पसरवाल तर जेलमध्ये जाल!

 शिरजगाव कसबा दि. ११ :-

कृत्रिम बुद्धिमत्ता (AI) तंत्रज्ञानाचा गैरवापर करून वाघाचा खोटा फोटो व्हायरल केल्याप्रकरणी अमरावती जिल्ह्यातील चांदूर बाजार तालुक्यातील देऊरवाडा येथील तरुणावर गुन्हा दाखल करण्यात आला आहे.

आरोपीचे नाव व वय: शेख समीर शेख आझाद (वय २४ वर्षे)  रा. देऊरवाडा, तालुका चांदूर बाजार, जिल्हा अमरावती.

आरोपीने १० सप्टेंबर २०२६ रोजी संध्याकाळी ५:३० वाजताच्या सुमारास आपल्या शेतातील भुईमुगाच्या पिकाचा फोटो काढला. त्यानंतर त्याने Google Gemini किंवा इतर AI एडिटिंग टूलचा वापर करून त्या फोटोमध्ये हुबेहूब दिसणारा एक वाघ एडिट करून बसवला. हा बनावट फोटो त्याने व्हॉट्सॲप आणि इतर सोशल मीडिया प्लॅटफॉर्मवर व्हायरल केला.

😨 परिसरात घबराट आणि प्रशासनाची धावपळ

हा फोटो सोशल मीडियावर वाऱ्यासारखा पसरल्यामुळे देऊरवाडा आणि आसपासच्या परिसरातील नागरिकांमध्ये प्रचंड घबराटीचे वातावरण निर्माण झाले.

वनविभाग आणि पोलीस प्रशासनाला याची माहिती मिळताच, त्यांनी तातडीने घटनास्थळी धाव घेतली.

१०  सप्टेंबर रोजी परिसरात सर्व्हे ऑपरेशन राबवण्यात आले.

नागरिकांच्या सुरक्षेसाठी ध्वनिक्षेपकावरून (लाऊडस्पीकर) दवंडी देऊन सतर्कतेचा इशाराही देण्यात आला.

मात्र, वनविभाग व पोलिसांनी कसून शोध घेतला असता तिथे वाघ किंवा कोणत्याही हिंस्त्र प्राण्याच्या पाऊलखुणा अथवा पुरावे आढळून आले नाहीत.

संशयित तरुण शेख समीर शेख आझाद याची पोलिसांनी सखोल चौकशी केली असता, त्याने केवळ "खोडसाळपणा" म्हणून हा बनावट फोटो तयार केल्याची कबुली दिली.

या अफवेमुळे वनविभाग, पोलीस कर्मचारी आणि स्थानिक नागरिकांचा नाहक वेळ आणि श्रम वाया गेले, तसेच परिसरात भीती पसरली.

याप्रकरणी वनपाल प्रदीप खांडेकर यांच्या लेखी अर्जावरून शिरजगाव कसबा पोलीस ठाण्यात आरोपी शेख समीरविरुद्ध BNS ३५३(१)(b) (भारतीय न्याय संहिता) अंतर्गत एनसीआर (NCR) दाखल करण्यात आला आहे.

आरोपी तरुणाने स्वतःची चूक कबूल केली असून, पोलीस ठाण्यात माफीनामा लिहून दिला आहे व यापुढे अशी चूक करणार नाही असे नमूद केले आहे.

प्रशासनाचे आवाहन (अलकेश ठाकरे, मानद वन्यजीव रक्षक)

"सोशल मीडियावर एआय (AI) किंवा कोणत्याही एडिटिंग ॲपचा वापर करून अफवा पसरवणारे किंवा नागरिकांमध्ये भीती निर्माण करणारे बनावट फोटो आणि व्हिडिओ शेअर करू नयेत. असे करणाऱ्यांवर कठोर कायदेशीर कारवाई केली जाईल."

असाच गुन्हा तिवसा पोलीस स्टेशन ला प्राप्त झाला आहे.