क्रीडा प्रबोधिनी प्रवेश प्रक्रिया सुरू; खेळाडूंना प्रशिक्षणाची संधी

 

अमरावती, दि. १६ (ग्रामीण उदय न्यूज नेटवर्क): महाराष्ट्र शासनाच्या क्रीडा व युवक सेवा संचालनालय आणि जिल्हा क्रीडा अधिकारी कार्यालय, अमरावती यांच्या संयुक्त विद्यमाने राज्यातील क्रीडा प्रबोधिनींमध्ये सन 2026-27 या शैक्षणिक वर्षासाठी निवासी प्रवेश प्रक्रिया अधिकृतपणे सुरू झाली आहे. या प्रक्रियेअंतर्गत पात्र आणि गुणवत्ताधारक खेळाडूंना 24 एप्रिल 2026 पर्यंत अर्ज सादर करण्याची मुदत आहे. ही मोहीम केवळ प्रवेशापुरती मर्यादित नसून, राज्यातील कानाकोपऱ्यातील प्रतिभावान खेळाडूंचा शोध घेऊन त्यांना जागतिक दर्जाचे शास्त्रोक्त प्रशिक्षण देण्याच्या उद्देशाने राबविण्यात येत आहे.

शिवछत्रपती क्रीडापीठाच्या मार्गदर्शनाखाली पुणे, नाशिक, कोल्हापूर, औरंगाबाद, अमरावती, नागपूर, अकोला, गडचिरोली आणि ठाणे अशा नऊ महत्त्वाच्या केंद्रांवर या प्रबोधिनी कार्यरत आहेत. निवड झालेल्या खेळाडूंना शासनातर्फे निवास, सकस भोजन, दर्जेदार शिक्षण आणि आधुनिक क्रीडा सुविधा विनामूल्य उपलब्ध करून दिल्या जातात. यामध्ये प्रामुख्याने आर्चरी, ज्युदो, हॅण्डबॉल, ॲथलेटिक्स, बॉक्सिंग, बॅडमिंटन, शुटिंग, कुस्ती, हॉकी, टेबल टेनिस, वेटलिफ्टिंग, जिम्नॅस्टिक्स, जलतरण, फुटबॉल, ट्रायथलॉन आणि सायकलिंग अशा एकूण 16 क्रीडा प्रकारांचा समावेश असून, तज्ज्ञ प्रशिक्षकांकडून नियमित सराव करून घेतला जाणार आहे.

प्रवेशाची ही प्रक्रिया दोन टप्प्यांत पार पडणार आहे. ज्या खेळाडूंनी राज्य पदक प्राप्त केले आहे किंवा राष्ट्रीय स्पर्धेत सहभाग नोंदवला आहे, त्यांना थेट निवडीची संधी उपलब्ध असेल. मात्र, इतर खेळाडूंना आपल्या कौशल्याची सिद्धता करण्यासाठी विभागीय स्तरावर होणाऱ्या चाचण्यांना सामोरे जावे लागेल. या चाचण्या 27 ते ३० एप्रिल दरम्यान आयोजित केल्या जाणार आहेत. निवडीसाठी केवळ अर्ज करणे पुरेसे नसून खेळाडूची तांत्रिक समज, शारीरिक तंदुरुस्ती आणि कामगिरीतील सातत्य या बाबी महत्त्वाच्या ठरणार आहेत. खेळाडूंनी या संधीचा लाभ घ्यावा, असे आवाहन जिल्हा क्रीडा अधिकारी यांनी केले आहे.