बोगसगिरीला चाप! आता खत विक्रेत्यांची मनमानी चालणार नाही; 'फार्मर आयडी'चे कवच

• 

  

  
  
  
  कृषी क्षेत्रात डिजिटल क्रांती: 'फार्मर आयडी'विना खत विक्रीवर बंदी

शेतकऱ्यांना ॲग्रीस्टॅक फार्मर आयडी अनिवार्य; अनुदानित खत वितरणात पारदर्शकता वाढणार

दि. २० भोकरदन:
राज्यातील अनुदानित रासायनिक खतांच्या वितरण प्रक्रियेत पारदर्शकता आणण्यासाठी सरकारने मोठा निर्णय घेतला आहे. आता 'ॲग्रीस्टॅक' योजनेंतर्गत काढलेला 'फार्मर आयडी' (Farmer ID) असल्याशिवाय शेतकऱ्यांना खत मिळणार नाही. या निर्णयामुळे खतांचा होणारा गैरप्रकार, लिंकिंग आणि काळाबाजार रोखण्यास मदत होणार आहे.

पारदर्शक वितरण: प्रत्येक शेतकऱ्याची 'डिजिटल ओळख' निश्चित होणार असल्याने, खत वितरणाचा संपूर्ण मागोवा (Tracking) घेणे शक्य होईल. यामुळे खतांचा चुकीचा वापर, दुबार नोंदणी आणि खतांच्या नावाखाली होणारी फसवणूक थांबेल.

थेट लाभ: नोंदणीकृत क्षेत्रानुसार आणि पिकांच्या गरजेनुसारच खतांचे वितरण केले जाईल. यामुळे पात्र लाभार्थ्यांच्या खात्यात अनुदानाची रक्कम थेट पोहोचण्यास मदत होईल.

जालना जिल्ह्याची स्थिती: जालना जिल्ह्यात आतापर्यंत सुमारे १ ते २ लाख शेतकऱ्यांचे फार्मर आयडी तयार झाले आहेत. उर्वरित शेतकऱ्यांची नोंदणी प्रक्रिया सध्या वेगाने सुरू आहे.

खरेदीवेळी कशी होईल पडताळणी?

 खत विक्री केंद्रांवर शेतकऱ्याचा फार्मर आयडी स्कॅन करूनच खतांचे वितरण केले जाईल.
डिजिटल प्रणालीमुळे प्रत्येक व्यवहाराची नोंद राहील, ज्यामुळे बोगसगिरीला आळा बसेल.
 शेतकऱ्याची जमीन, पीक आणि ओळख याची माहिती डिजिटल डेटाबेसमध्ये आधीच उपलब्ध असेल.

फार्मर आयडी कुठे आणि कसा काढायचा?

शेतकरी आपला फार्मर आयडी खालील ठिकाणी काढू शकतात:

• तलाठी कार्यालय
• CSC केंद्र (सामुदायिक सेवा केंद्र)
• कृषी विभाग कार्यालय
• यासाठी आधार कार्ड, ७/१२ उतारा आणि मोबाईल क्रमांक असणे आवश्यक आहे.

"फार्मर आयडीमुळे खत वितरणात पारदर्शकता वाढणार असून शेतकऱ्यांना थेट लाभ मिळेल. यामुळे गैरप्रकारांना पूर्ण आळा बसेल."
— अमोल शिंदे, तालुका कृषी अधिकारी, भोकरदन.