पुतिन भारतात दाखल: पंतप्रधान मोदींकडून विमानतळावर विशेष स्वागत

द्विपक्षीय करारांवर भर

दि.५ नवी दिल्ली: रशियाचे राष्ट्राध्यक्ष व्लादिमीर पुतिन हे २३व्या भारत-रशिया वार्षिक शिखर परिषदेसाठी भारत दौऱ्यावर दाखल झाले आहेत. गुरुवारी (४ डिसेंबर २०२५) संध्याकाळी त्यांचे दिल्लीच्या पालम विमानतळावर आगमन झाले.

पंतप्रधान नरेंद्र मोदी यांनी स्वतः विमानतळावर उपस्थित राहून पुतिन यांचे विशेष स्वागत केले आणि त्यांची गळाभेट घेतली. त्यानंतर दोन्ही नेते एकाच गाडीतून पंतप्रधानांच्या निवासस्थानी रवाना झाले, जिथे पुतिन यांच्या सन्मानार्थ खासगी डिनरचे आयोजन करण्यात आले होते. मोदींनी प्रोटोकॉल बाजूला ठेवून केलेल्या या स्वागतामुळे जगभराचे लक्ष वेधले गेले आहे.

 हा दौरा भारत-रशिया धोरणात्मक भागीदारीतील एक महत्त्वाचा टप्पा मानला जात असून, दोन्ही देशांमधील संबंध अधिक दृढ करणे हा मुख्य उद्देश आहे.

चर्चेचे विषय:

संरक्षण: S-400 क्षेपणास्त्र प्रणाली आणि लढाऊ विमानांसह इतर संरक्षण करारांवर चर्चा होण्याची शक्यता आहे.

व्यापार व ऊर्जा: व्यापार, ऊर्जा (कच्चे तेल आणि नैसर्गिक वायू), आरोग्यसेवा आणि आर्थिक सहकार्य वाढवण्यावर भर दिला जाईल.

आर्थिक भागीदारी: दोन्ही देशांनी २०३० पर्यंत द्विपक्षीय व्यापार १०० अब्ज डॉलरपर्यंत नेण्याचे उद्दिष्ट ठेवले आहे.

परस्पर हिताचे प्रादेशिक आणि जागतिक मुद्द्यांवरही दोन्ही नेत्यांमध्ये विचारविनिमय होईल.

युक्रेनवरील आक्रमणापासून पुतिन यांचा हा पहिलाच भारत दौरा आहे. आज (५ डिसेंबर २०२५) सकाळी पुतिन यांना गार्ड ऑफ ऑनर देण्यात आला. त्यानंतर हैदराबाद हाऊसमध्ये पंतप्रधान मोदी आणि पुतिन यांच्यात उच्चस्तरीय चर्चा सुरू झाली आहे.