अकोल्याच्या रोशन हुसेनचे अभियांत्रिकी सेवा परीक्षेत घवघवीत यश

 वर्ग एक अधिकारी बनण्याचा मान

दि. २४ अकोला: अकोला जिल्ह्यातील पातूर तालुक्यातील शिर्ला गावातील रहिवासी असलेल्या रोशन हुसेन यांनी महाराष्ट्र अभियांत्रिकी सेवा परीक्षेत राज्यात १८वा क्रमांक मिळवून मोठे यश संपादन केले आहे. त्यांच्या या कामगिरीमुळे वर्ग एक अधिकारी बनण्याचा त्यांचा मार्ग मोकळा झाला असून, संपूर्ण शिर्ला गावात आणि अकोला जिल्ह्यात आनंदाचे आणि कौतुकाचे वातावरण आहे.

• रोशन हुसेन यांचे प्राथमिक शिक्षण शिर्ला गावात झाले. अत्यंत सामान्य कौटुंबिक पार्श्वभूमीतून आलेल्या रोशन यांनी जिद्द आणि मेहनतीच्या जोरावर हे यश मिळवले आहे. अभियांत्रिकी पदवी प्राप्त केल्यानंतर त्यांनी शासकीय सेवेत रुजू होण्याचे ध्येय ठेवले आणि त्यासाठी कठोर परिश्रम घेतले. कोणत्याही मोठ्या शहरात जाऊन महागडे क्लासेस न लावता, त्यांनी स्वयंअध्ययन आणि योग्य मार्गदर्शनाच्या आधारे हे यश मिळवले आहे.
  रोशन यांच्या यशाची बातमी गावात पोहोचताच, कुटुंबीय आणि ग्रामस्थांनी मोठा जल्लोष केला. फटाक्यांची आतषबाजी करण्यात आली आणि गुलालाची उधळण करून आनंद व्यक्त करण्यात आला. गावातील तरुण पिढीसाठी रोशन हुसेन हे एक आदर्श बनले आहेत, अशा प्रतिक्रिया ग्रामस्थांनी दिल्या आहेत.
  रोशन यांच्या या यशामुळे शिर्ला गावाचे नाव राज्यभर पोहोचले आहे. त्यांच्यावर प्रशासकीय आणि राजकीय वर्तुळातून अभिनंदनाचा वर्षाव होत आहे.