१ ऑक्टोबरपासून एसटी प्रवासात NCMC कार्ड अनिवार्य!

दि. २८ :-
 महाराष्ट्र राज्य मार्ग परिवहन महामंडळाने (MSRTC) ज्येष्ठ नागरिक आणि महिला प्रवाशांसाठी अत्यंत महत्त्वाचा निर्णय घेतला आहे. 

महाराष्ट्र राज्य मार्ग परिवहन महामंडळाच्या (एसटी) विविध सवलत योजनांचा लाभ घेणाऱ्या अमृत ज्येष्ठ नागरिक, ज्येष्ठ नागरिक आणि महिला प्रवाशांसाठी १ ऑक्टोबर २०२६ पासून राष्ट्रीय सामान्य गतिशीलता कार्ड (NCMC) अनिवार्य करण्यात येत आहे. १ ऑक्टोबरनंतर एसटीचे सवलतीचे तिकीट केवळ या NCMC कार्डद्वारेच दिले जाईल. 

 शासनाच्या निर्देशानुसार दिल्या जाणाऱ्या सवलतींचा प्रवास अधिक पारदर्शक, डिजिटल आणि सुलभ करण्यासाठी महामंडळाने ही नवीन प्रणाली लागू केली आहे. 

 सवलतधारक प्रवाशांसाठी राज्यभरातील सर्व एसटी आगार (डेपो) आणि बसस्थानकांवर कार्ड नोंदणी तसेच वितरणाची प्रक्रिया सुरू करण्यात आली आहे.

ज्या प्रवाशांनी कार्डसाठी नोंदणी केली आहे परंतु अद्याप मूळ कार्ड मिळाले नाही, त्यांना एक QR कोड असलेली नोंदणी पावती दिली जात आहे. ही पावती वाहकाच्या (कंडक्टरच्या) ईटीएम (ETIM) मशीनवर स्कॅन करून प्रवाशांना सवलतीचे तिकीट मिळवता येईल.

 नोंदणी केल्यानंतर मिळणारी ही QR कोड पावती केवळ ३० दिवसांपर्यंतच वैध राहील. या ३० दिवसांच्या कालावधीत प्रवाशांनी आपले मूळ NCMC कार्ड प्राप्त करून, ते सक्रिय (Active) करून त्यात आवश्यक टॉप-अप (Top-up/Recharge) करणे बंधनकारक आहे. 

प्रवासी आपल्या NCMC कार्डचे बॅलन्स 'BHIM App' द्वारे कार्डच्या मागील बाजूचा QR कोड स्कॅन करून सहजपणे टॉप-अप करू शकतात.

💳 नोंदणी कुठे आणि कशी करावी?

महामंडळाने कार्ड नोंदणी आणि वितरणासाठी 'ई-बॉक्स टेक्नॉलॉजीज लिमिटेड' (Ebix Technologies Limited) यांची अधिकृत एजंट म्हणून नियुक्ती केली आहे. प्रवासी आपल्या जवळच्या एसटी बसस्थानक, आगार किंवा त्यांच्या अधिकृत केंद्रांवर जाऊन ही नोंदणी पूर्ण करू शकतात. 

 एसटी महामंडळाने सर्व पात्र सवलतधारक महिला आणि ज्येष्ठ नागरिकांना कोणत्याही गैरसोयीशिवाय प्रवास सुरू ठेवण्यासाठी १ ऑक्टोबरपूर्वी आपली नोंदणी करून घेण्याचे आवाहन केले आहे. अधिक माहितीसाठी तुम्ही MSRTC च्या अधिकृत पोर्टलला भेट देऊ शकता