कोर्टाच्या कँटीनवर एफडीएची धाड; हायकोर्टाच्या 'त्या' सवालानंतर तुकाराम मुंढेंची २४ तासांत मोठी कारवाई!

दि. १ ऑगस्ट:-

 हि  बातमी  महाराष्ट्र अन्न व औषध प्रशासनाचे (FDA) आयुक्त तुकाराम मुंढे यांनी मुंबई उच्च न्यायालयाच्या  कँटीनवर टाकलेल्या धाडीशी संबंधित आहे. 

 मुंबई उच्च न्यायालयात अन्न सुरक्षा परवाना निलंबनाच्या एका प्रकरणावर सुनावणी सुरू होती. त्यावेळी न्यायालयाने एफडीए (FDA) च्या कारवाईवर प्रश्नचिन्ह उपस्थित केले. "तुम्ही फक्त खाजगी हॉटेल्स आणि रेस्टॉरंट्सनाच टार्गेट करता का? सरकारी कार्यालयांच्या कँटीनमध्येही अस्वच्छता असू शकते, तिथे कधी धाड टाकणार?" असा सवाल न्यायालयाने विचारला होता. तसेच हायकोर्ट आणि मंत्रालयाच्या कँटीनची तपासणी झाली आहे का, अशी विचारणाही केली. 

न्यायालयाच्या या खोचक टिप्पणीनंतर अवघ्या २४ तासांच्या आतच आयुक्त तुकाराम मुंढे यांच्या मार्गदर्शनाखाली एफडीएच्या विशेष पथकाने थेट मुंबई उच्च न्यायालयाच्या आवारातील तीन कँटीनची अचानक तपासणी (Raid) केली. 

 तपासणी दरम्यान उच्च न्यायालयाच्या आवारातील दोन कँटीनकडे आवश्यक असलेला FSSAI चा अन्न सुरक्षा परवाना किंवा नोंदणीच नसल्याचे उघड झाले.

 कँटीनमध्ये अन्न सुरक्षा मानके आणि नियमांचे (Schedule 4) उल्लंघन झाल्याचे आढळून आले.

वैध परवाना नसल्यामुळे आणि नियमांचे पालन न केल्यामुळे एफडीएने कँटीन चालकाला नोटीस बजावली आणि पुढील आदेशापर्यंत हायकोर्टाचे कँटीन तात्पुरते बंद करण्याचे आदेश दिले.

 दुसरीकडे, बॉम्बे बार असोसिएशनने खबरदारीचा उपाय म्हणून स्वतःहून हे कँटीन तात्पुरते बंद केल्याचे म्हटले आहे. 

हायकोर्टाने विचारलेल्या प्रश्नाचे उत्तर थेट कृतीतून दिल्यामुळे सोशल मीडियावर तुकाराम मुंढे यांच्या या "मुंढे पॅटर्न" आणि धडाकेबाज कार्यशैलीची जोरदार चर्चा रंगली आहे.