शिरजगावातील मेघा नदीच्या पदरस्त्याला झाडाझुडपांचा विळखा

 प्रशासनाचे स्वच्छतेकडे दुर्लक्ष

कोट्यवधींचा निधी 'धुळीत'; मेघा नदीच्या सौंदर्याकरणाला घाणीचा विळखा!

दुरुस्तीची जबाबदारी कुणाची? शिरजगावच्या पदरस्त्यावर झुडपांचे साम्राज्य.

दि. १० शिरजगाव कसबा: चांदूर बाजार तालुक्यातील शिरजगाव येथील मेघा नदीच्या सौंदर्याकरणासाठी शासनाने कोट्यवधी रुपये खर्च केले, मात्र सध्या या परिसराची दुरवस्था झाली आहे. नदीकाठच्या पदरस्त्यावर मोठ्या प्रमाणात झाडी-झुडपे वाढली असून कचरा आणि घाणीच्या विळख्यामुळे नागरिकांमध्ये संतापाची लाट उसळली आहे.

आमदार निधीतून झाले होते सौंदर्याकरण

माजी राज्यमंत्री व आमदार बच्चू कडू यांच्या निधीतून मेघा नदीवर पूर संरक्षण भिंत, पदरस्ता आणि सौंदर्याकरणाची कामे करण्यात आली होती. यामुळे गावाच्या सौंदर्यात भर पडली होती. मात्र, देखभालीच्या अभावामुळे या कामाचा मूळ उद्देश हरवत चालला आहे.

परिसरात दुर्गंधी आणि घाणीचे साम्राज्य

ग्रामपंचायतीकडून या परिसराची नियमित स्वच्छता केली जात नसल्याने अनेक नागरिक संरक्षण भिंतीच्या रस्त्यालगतच शौचास बसतात. त्यामुळे परिसरात मोठी दुर्गंधी पसरली असून पादचाऱ्यांना ये-जा करणे कठीण झाले आहे. तसेच ठिकठिकाणी कचऱ्याचे ढिगारे साचल्याने आरोग्याचा प्रश्न निर्माण झाला आहे. हागणदारी मुक्तीसाठी शासनाकडून मोहिमा राबवल्या जातात, मात्र येथे कोणत्याही प्रकारची जनजागृती किंवा कारवाई होताना दिसत नाही.

जीवितहानीची भीती

पदरस्त्यावर गवत आणि झुडपे वाढल्याने तिथे साप, विंचू यांसारख्या विषारी प्राण्यांचा वावर वाढला आहे. या परिसराजवळच अंगणवाडी केंद्र, शासकीय कार्यालय आणि वाचनालय असल्याने लहान मुले व नागरिकांच्या जिवाला धोका निर्माण झाला आहे.

प्रशासनाची भूमिका

या समस्येबाबत ग्रामसेवक सुरेश रेखाते यांनी सांगितले की, "येणाऱ्या मासिक सभेत हा विषय घेऊन तातडीने साफसफाईचे काम हाती घेतले जाईल. तसेच परिसरात सार्वजनिक कचरा कुंड्या बसवून जनजागृतीचे फलक लावले जातील."

नदीकाठची ही दुरवस्था दूर करून प्रशासनाने तातडीने नियोजनबद्ध स्वच्छता मोहीम राबवावी, अशी मागणी शिरजगावचे ग्रामस्थ करत आहेत.