अंजनगाव सुर्जी:- शासकीय विश्रामगृहाजवळ भीषण अपघात

 आयशर ट्रकच्या धडकेत कारचालक गंभीर

अंजनगाव सुर्जी ८ डिसेंबर :

येथील शासकीय विश्रामगृहाजवळील मुख्य रस्त्यावर काल (७ डिसेंबर) सायंकाळच्या सुमारास एक भीषण अपघात घडला. भरधाव वेगाने येणाऱ्या आयशर ट्रकने वॅगनआर कारला जोरदार धडक दिली, ज्यात कारचालक गंभीररित्या जखमी झाला आहे. या घटनेमुळे या भागातील वाहतुकीच्या सुरक्षिततेचा प्रश्न पुन्हा एकदा ऐरणीवर आला आहे.

मिळालेल्या माहितीनुसार, आयशर ट्रक हा अंजनगावहून परतवाडा दिशेने जात होता, तर वॅगनआर कार  समोरून येत होती. शासकीय विश्रामगृहाच्या वळणावर ट्रक चालकाचे नियंत्रण सुटले आणि ट्रकने कारला जोरदार धडक दिली. धडक इतकी भीषण होती की, कारचा चक्काचूर झाला.

  या अपघातात वॅगनआर कारचालक गंभीर जखमी झाला असून, त्याला तातडीने स्थानिक रुग्णालयात दाखल करण्यात आले. प्राथमिक उपचारानंतर पुढील उपचारासाठी त्याला अमरावती येथे हलवण्यात आले आहे. अपघातामुळे रस्त्यावर काही काळ वाहतूक ठप्प झाली होती.

  घटनेची माहिती मिळताच अंजनगाव सुर्जी पोलीस तातडीने घटनास्थळी दाखल झाले. त्यांनी पंचनामा केला असून, ट्रक चालकाविरुद्ध गुन्हा दाखल करण्याची प्रक्रिया सुरू आहे.

सुरक्षिततेचा प्रश्न ऐरणीवर:

शासकीय विश्रामगृहाजवळील हा रस्ता नेहमीच गजबजलेला असतो आणि यापूर्वीही येथे छोटे-मोठे अपघात झाले आहेत. भरधाव वेगाने जाणारी वाहने आणि रस्त्यावरील संभाव्य धोके यामुळे या मार्गावर वाहतुकीची सुरक्षितता सुनिश्चित करण्याची मागणी स्थानिक नागरिक आणि वाहनचालकांकडून पुन्हा एकदा जोर धरू लागली आहे. प्रशासनाने यावर तातडीने उपाययोजना कराव्यात, अशी अपेक्षा व्यक्त होत आहे.