राज्यातील शिक्षण क्षेत्राला हादरवून टाकणाऱ्या टीईटी (शिक्षक पात्रता परीक्षा) पेपरफुटी प्रकरणातील आरोपींनी आता 'सेट' (राज्य प्राध्यापक पात्रता) परीक्षेचाही पेपर फोडल्याची धक्कादायक कबुली दिली आहे. अटक करण्यात आलेली महेश गायकवाड टोळी आणि त्यांच्या साथीदारांनी या गैरप्रकाराची कबुली दिली असून, तपास यंत्रणांच्या पायाखालची जमीन सरकली आहे.
टीईटी परीक्षेतील गैरप्रकार उघडकीस आल्यानंतर पोलिसांनी तपास सुरू केला. या तपासादरम्यान, आरोपींनी केवळ टीईटीच नव्हे, तर राज्य सरकारच्या 'सेट' (SET - State Eligibility Test) परीक्षेचा पेपर देखील लिक केल्याचे समोर आले आहे.
आरोपींनी चौकशीदरम्यान कबूल केले आहे की, त्यांनी 'सेट' परीक्षेला बसलेल्या अनेक परीक्षार्थींना लक्ष्य केले. प्रत्येकी तीन लाख रुपयांची मोठी रक्कम घेऊन त्यांना परीक्षेपूर्वीच प्रश्नपत्रिका किंवा उत्तरे पुरवण्यात आली. या रॅकेटमध्ये राज्यातील अनेक भागांतील उमेदवार सामील असण्याची शक्यता पोलिसांनी वर्तवली आहे.
या प्रकरणाच्या सखोल तपासासाठी पोलीस पथके कार्यरत असून, या रॅकेटमध्ये आणखी कोण-कोण सामील आहे, याचा शोध घेतला जात आहे. या घडामोडींमुळे राज्यातील स्पर्धा परीक्षांच्या विश्वासार्हतेवर प्रश्नचिन्ह निर्माण झाले आहे.
Post a Comment
0 Comments