दर्यापूर ला एसटी बस व ट्रक अपघातात ट्रक ड्रायव्हरचा मृत्यू

 

दर्यापूर दिनांक ३० 

 (ग्रामीण उदय न्यूज नेटवर्क)

अमरावती-दर्यापूर मार्गावरील लखापूर फाट्याजवळ आज गुरुवारी सकाळी ६:१५ वाजताच्या सुमारास एसटी बस आणि ट्रकचा अत्यंत भीषण अपघात झाला आहे. या अपघातात ट्रकचे वाहक (क्लीनर) श्याम महादेव भुटे (वय ५५, रा. दामोडी) यांचा उपचारादरम्यान दुर्दैवी मृत्यू झाला असून, अन्य सुमारे ७ ते १० जण गंभीर जखमी झाले आहेत. 

 दर्यापूर बसस्थानकातून सुटलेली दर्यापूर-हिंगणघाट एसटी बस (MH 40 Y 5304) आणि अमरावतीकडून येणारा ट्रक यांच्यात लखापूर फाटा ते आरळा फाटा दरम्यान समोरासमोर जोरदार धडक झाली. 

अपघात घडला त्यावेळी परिसरात मुसळधार पाऊस सुरू होता. पाऊस आणि धुक्यामुळे समोरील रस्ता स्पष्ट न दिसल्याने (कमी दृश्यमानता) हा अपघात घडल्याचा प्राथमिक अंदाज वर्तवला जात आहे.

 हा अपघात इतका भीषण होता की दोन्ही वाहनांच्या पुढील भागाचा पूर्णपणे चक्काचूर झाला. ट्रकच्या ड्रायव्हर केबिनचा चुराडा झाल्याने मृत श्याम भुटे आणि चालक आतमध्येच अडकून पडले होते. 

अपघाताची माहिती मिळताच स्थानिक रुग्णसेवक, नागरिक आणि दर्यापूर पोलिसांनी घटनास्थळी धाव घेतली. केबिनमध्ये अडकलेल्या जखमींना कशाबशा प्रयत्नाने बाहेर काढण्यात आले.

 गंभीर जखमी झालेले ट्रक वाहक श्याम भुटे यांना तातडीने दर्यापूर उपजिल्हा रुग्णालयात दाखल करण्यात आले, मात्र तेथील डॉक्टरांनी त्यांना मृत घोषित केले. 

या अपघातात एसटी बसचे चालक, वाहक (कंडक्टर), ट्रकचालक आणि बसमधील ६ ते ८ प्रवासी गंभीर जखमी झाले आहेत. त्यांच्यावर दर्यापूर येथील उपजिल्हा रुग्णालयात उपचार सुरू आहेत.

 अपघातामुळे अमरावती-दर्यापूर मुख्य मार्गावरील वाहतूक काही काळ पूर्णपणे ठप्प झाली होती. पोलिसांनी क्रेनच्या साहाय्याने अपघातग्रस्त वाहने रस्त्यावरून बाजूला सारून वाहतूक पूर्ववत केली.

 उपविभागीय पोलीस अधिकारी (SDPO) सतीश कुलकर्णी यांनी उपजिल्हा रुग्णालयाला भेट देऊन जखमींची विचारपूस केली आहे. दर्यापूर पोलीस या घटनेचा पुढील तपास करत आहेत.