बांधकाम क्षेत्रातील तरुणांना इस्रायलमध्ये नोकरीची संधी

पात्र उमेदवारांनी लाभ घेण्याचे आवाहन

अमरावती, दि. २३ (ग्रामीण उदय न्यूज नेटवर्क): आंतरराष्ट्रीय स्तरावर नोकरीच्या शोधात असलेल्या सुशिक्षित तरुणांसाठी इस्रायल देशामध्ये रोजगाराची संधी उपलब्ध झाली आहे. जिल्हा कौशल्य विकास, रोजगार व उद्योजकता मार्गदर्शन केंद्र, अमरावती आणि एनएसडीसी यांच्या संयुक्त विद्यमाने इस्रायलमधील 'रिनोवेशन कन्स्ट्रक्शन' क्षेत्रात एकूण 2600 जागांसाठी ही भरती प्रक्रिया राबविण्यात येत आहे. या संधीचा जास्तीत जास्त पात्र उमेदवारांनी लाभ घ्यावा, असे आवाहन सहायक आयुक्त श्रीमती प्रांजली बारस्कर यांनी केले आहे.

या भरती प्रक्रियेअंतर्गत विविध तांत्रिक कामांसाठी पदसंख्या उपलब्ध आहे. यामध्ये प्रामुख्याने प्लास्टरिंग वर्क (हजार जागा), सिरेमिक टायलिंग (हजार जागा), ड्रायवॉल वर्कर (300 जागा) आणि मेसन (300 जागा) यांचा समावेश आहे. बांधकाम क्षेत्रातील अनुभव असलेल्या उमेदवारांसाठी  परदेशात काम करण्याची ही उत्तम संधी आहे. इच्छुक उमेदवारांनी या रोजगाराच्या संधीचा लाभ

घेण्यासाठी maharestransinternational.com या संकेतस्थळावर जाऊन उपलब्ध माहितीचे अवलोकन करावे. अर्जासाठी दिलेल्या अधिकृत गुगल फॉर्मच्या लिंकवर आपली माहिती अचूक भरावी. अर्ज भरताना किंवा प्रक्रियेबाबत काही शंका असल्यास उमेदवारांनी जिल्हा कौशल्य विकास, रोजगार व उद्योजकता मार्गदर्शन केंद्र, शासकीय तांत्रिक विद्यालय परिसर, उस्मानिया मस्जिद जवळ, डेपो रोड, अमरावती येथे प्रत्यक्ष भेट द्यावी. तसेच अधिक माहितीसाठी कार्यालयाचा दूरध्वनी क्रमांक ०७२१-२५६६०६६ किंवा amravatirojgar@gmail.com या ईमेलवर संपर्क साधण्याचे आवाहन करण्यात आले आहे.