सावधान! बनावट जनगणना अर्जात माहिती भरू नका; सोशल मीडियावरील लिंक्सपासून दूर राहण्याचे आवाहन

दि. ५ चांदूरबाजार:
देशाच्या नियोजन आणि विकासासाठी अत्यंत महत्त्वाची असणारी जनगणना प्रक्रिया सध्या सुरू झाली आहे. मात्र, याच प्रक्रियेचा गैरफायदा घेत सोशल मीडियावर काही बनावट ऑनलाईन अर्ज आणि लिंक्स फिरत असल्याचे समोर आले आहे. या फसव्या प्रकारापासून नागरिकांनी सावध राहावे, असे आवाहन सरकारने केले आहे.

बनावट अर्जांचा सुळसुळाट: जनगणनेच्या नावाखाली सोशल मीडियावर एक बोगस अर्ज व्हायरल झाला आहे. या माध्यमातून नागरिकांची वैयक्तिक माहिती चोरली जाण्याची भीती व्यक्त करण्यात आली आहे.

डिजिटल जनगणनेची सुविधा: यंदा प्रथमच नागरिकांना 'स्व-गणना' (Self-Enumeration) करण्यासाठी डिजिटल सुविधा उपलब्ध करून देण्यात आली आहे. यामुळे प्रक्रिया अधिक पारदर्शक आणि अचूक होणार आहे.

१ मे ते १५ मे: या कालावधीत नागरिक ऑनलाईन पद्धतीने स्वतःची व कुटुंबाची माहिती भरू शकतात.

१६ मे ते १४ जून: या काळात प्रत्यक्ष 'घरयादी' व 'घरगणना' टप्पा पार पडणार आहे.

अधिकृत संकेतस्थळ: माहिती व जनसंपर्क महासंचालनालयाने (DGIPR) स्पष्ट केले आहे की, नागरिकांनी केवळ census.gov.in या अधिकृत पोर्टलचाच वापर करावा.

फायदा काय?: जर नागरिकांनी स्वतःहून पोर्टलवर माहिती भरली, तर त्यानंतर होणारी प्रगणकांची प्रत्यक्ष भेट अधिक सुलभ आणि जलद होईल.

प्रशासनाचा इशारा:
शासनाने निश्चित केलेल्या अधिकृत संकेतस्थळाशिवाय किंवा अ‍ॅपशिवाय इतर कोणत्याही अनधिकृत लिंकवर आपली खासगी माहिती शेअर करू नये. अशा प्रकारच्या ढिलाईमुळे आर्थिक फसवणूक किंवा डेटा चोरी होऊ शकते, असा इशारा माहिती व जनसंपर्क विभागाने दिला आहे.