चांदूरबाजार नगरपरिषदेवर 'प्रहार'चा झेंडा; भाजपला मोठा धक्का

अमरावती जिल्ह्यातील चांदूरबाजार नगरपरिषद निवडणुकीत आमदार बच्चू कडू यांच्या प्रहार जनशक्ती पक्षाने ऐतिहासिक विजय नोंदवला आहे. 

दि.२३ चांदूरबाजार : राज्यातील स्थानिक स्वराज्य संस्थांच्या निवडणुकीत अमरावती जिल्ह्यातील चांदूरबाजार नगरपरिषदेत आमदार बच्चू कडू यांच्या प्रहार जनशक्ती पक्षाने निर्भेळ यश मिळवले आहे. अत्यंत चुरशीच्या ठरलेल्या या निवडणुकीत प्रहारने भारतीय जनता पक्षाच्या (BJP) बालेकिल्ल्याला खिंडार पाडत बहुमत गाठले आहे 

नगराध्यक्षपदी मनीषा नांगलिया: प्रहार जनशक्ती पक्षाच्या उमेदवार मनीषा मनीष नांगलिया यांची चांदूरबाजार नगरपरिषदेच्या नगराध्यक्षपदी निवड झाली आहे  विशेष म्हणजे, भाजपने उमेदवारी नाकारल्यानंतर त्यांनी प्रहारमध्ये प्रवेश केला होता आणि आता त्यांनीच भाजपच्या उमेदवाराचा पराभव करून विजय मिळवला आहे 

संख्याबळ: एकूण २० जागांपैकी प्रहार जनशक्ती पक्षाने १३ जागांवर विजय मिळवून स्पष्ट बहुमत प्राप्त केले आहे . या निकालामुळे बच्चू कडूंचे वर्चस्व पुन्हा एकदा सिद्ध झाले आहे.

भाजपला हादरा: अमरावती जिल्ह्यात भाजपने अनेक ठिकाणी यश मिळवले असले तरी, चांदूरबाजारमध्ये मात्र त्यांना मोठा धक्का बसला आहे. या विजयामुळे प्रहार कार्यकर्त्यांमध्ये उत्साहाचे वातावरण आहे 

कार्यकर्त्यांचा जल्लोष: विजयाची घोषणा होताच चांदूरबाजारमध्ये प्रहारच्या कार्यकर्त्यांनी गुलालाची उधळण करत आणि फटाके फोडून जल्लोष केला. तसेच आमदार बच्चू कडू यांची घोड्यावरून मिरवणूक काढत आनंद साजरा करण्यात आला

या विजयानंतर बोलताना कार्यकर्त्यांनी हा विजय सामान्यांचा आणि बच्चू कडूंच्या कामाचा असल्याच्या प्रतिक्रिया व्यक्त केल्या आहेत .