सफाई कामगार यांना न्याय द्यावा

प्रति,

मा. वर्षा लड्डा (भा.प्र.से.)

आयुक्त

अमरावती महानगरपालिका, अमरावती.

विषय : गाडगेनगर परिसरातील रोहन वानखडे या स्वच्छता कर्मचाऱ्यांवरील मारहाणीच्या घटनेचा निषेध करून कामगारांच्या सुरक्षेबाबत तात्काळ उपाययोजना करण्याबाबत.

महोदय,

गाडगेनगर परिसरात स्वच्छता काम करणाऱ्या विलास नगर येथील  रोहन वानखडे  स्वच्छता कर्मचाऱ्यावर झालेल्या मारहाणीची घटना अत्यंत गंभीर, निषेधार्ह आणि चिंताजनक आहे. या घटनेचा अखिल भारतीय नौजवान सभा, महाराष्ट्रचे राज्य सचिव सागर दुर्योधन यांच्या वतीने तसेच विविध क्षेत्रातील कामगार संघटनांच्या वतीने आम्ही तीव्र निषेध व्यक्त करीत आहोत. शहराची स्वच्छता राखण्यासाठी जीव धोक्यात घालून काम करणाऱ्या स्वच्छता कर्मचाऱ्यांना आजही मूलभूत सुरक्षा सुविधा उपलब्ध होत नाहीत. रेनकोट, सुरक्षा बूट, हातमोजे, सुरक्षा टोपी, परावर्तित जॅकेट यांसारखी अत्यावश्यक सुरक्षा साधने त्यांना देण्यात आलेली नाहीत. त्यामुळे कामगारांना प्रतिकूल हवामान, अपघात आणि इतर धोक्यांचा सामना करावा लागत आहे. आता त्यांच्या जीवित सुरक्षेचाही प्रश्न गंभीर बनला आहे. स्वच्छता सेवा तथाकथित कंत्राटी पद्धतीने राबविली जात असली, तरी शहर स्वच्छतेची अंतिम व मूलभूत जबाबदारी अमरावती महानगरपालिकेचीच आहे. तथाकथित कंत्राटदाराच्या नावाखाली महानगरपालिकेला जबाबदारी झटकता येणार नाही. कामगारांच्या सुरक्षिततेची, सन्मानाची आणि आवश्यक सुविधा उपलब्ध करून देण्याची कायदेशीर व नैतिक जबाबदारी महानगरपालिकेवर आहे.

त्यामुळे आपण या प्रकरणात तातडीने हस्तक्षेप करून खालील मागण्यांची त्वरित पूर्तता करावी, ही विनंती आहे.

आमच्या प्रमुख मागण्या :

स्वच्छता कर्मचाऱ्यांवरील मारहाणीच्या घटनेची निष्पक्ष चौकशी करून दोषींवर कठोर कायदेशीर कारवाई करण्यात यावी.

१.सर्व स्वच्छता कर्मचाऱ्यांच्या सुरक्षेसाठी आवश्यक उपाययोजना तात्काळ राबविण्यात याव्यात.

२.सर्व कर्मचाऱ्यांना रेनकोट, सुरक्षा बूट, हातमोजे, सुरक्षा टोपी, परावर्तित जॅकेट व इतर आवश्यक सुरक्षा साहित्य त्वरित उपलब्ध करून देण्यात यावे.

३.कामगारांच्या सुरक्षिततेसाठी कायमस्वरूपी कार्यपद्धती (SOP) तयार करून त्याची प्रभावी अंमलबजावणी करण्यात यावी.

भविष्यात अशा घटना टाळण्यासाठी महानगरपालिकेने नियमित देखरेख व उत्तरदायित्व निश्चित करावे.

महानगरपालिकेने या गंभीर प्रश्नाकडे तातडीने लक्ष देऊन योग्य निर्णय घ्यावा. अन्यथा अखिल भारतीय नौजवान सभा व विविध कामगार संघटनांच्या वतीने लोकशाही मार्गाने तीव्र आंदोलन छेडण्यात येईल, याची कृपया नोंद घ्यावी.

                                                                                                          

                                                                                                           आपला विश्वासू,

                                                                                                             सागर दुर्योधन

                                                                                                              राज्य सचिव 

                                                                                    अखिल भारतीय नौजवान सभा, महाराष्ट्र  ,                                                                                             तसेच विविध कामगार संघटनांच्या वतीने.

                                                                                             (९६६५१८५४२८/७४९९३९०५२३)  प्रतिलिपी  :- 

१  मा. ना.मुख्यमंत्री म.रा. /मा.पालकमंत्री अमरावती .                                                   

२  मा.जिल्हाधिकारी अमरावती                                                                         

३  मा.पोलीस आयुक्त अमरावती.                              

४  मा.सहाय्यक कामगार उप आयुक्त अमरावती.